|
Síðdegisfréttir 27. júní 1997 á FM 95.7
Einar Gylfi Jónsson, deildarstjóri forvarnardeildar SÁÁ, segist fagna frumkvæði Ægis,
íslensks fyrirtækis sem ætlar að vinna að stofnun alþjóðasamtaka gegn fíkniefnavandanum
á heimsvísu í gegnum Internetið. Við greindum frá því í fréttum í gær að fyrirtækið hafi nú
þegar hafið vinnu við að koma á samböndum á milli aðila víðsvegar um heiminn sem
berjast gegn fíkniefnum. Að sögn Sigrúnar Ólafsdóttur hjá Ægis er markmiðið að koma
öllum þessum aðilum saman undir einn hatt á netinu þannig að tengingar og samstarf
þeirra á milli verði virkara og baráttan því öflugri. Einar Gylfi segir að ef fyrirtækið ætli sér að virka sem mótvægi við þann flaum af efni á netinu sem er til dýrða eiturefnunum þá sé
það hið besta mál. Einar Gylfi segir að internetið sé mikið notað til þess að lofsyngja
vímuefni og á mörgum síðum sé slegið fram staðhæfingum sem séu úr lausu loftni gripnar.
Hádegisfréttir 26.júní 1997 á FM 95.7
Íslenskt fyrirtæki er að vinna að stofnun alþjóðasamtaka sem eiga að vinna gegn
fíkniefnavandanum á heimsvísu. Fyrirtækið heitir Ægis en það er tveggja mánaða gamalt
og vinnur að internets- og margmiðlunarframleiðslu. Fyrirtækið hefur nú þegar hafið vinnu
við að koma á samböndum á milli aðila víðsvegar um heiminn sem berjast gegn fíkniefnum.
Markmiðið er að koma öllum þessum aðilum saman undir einn hatt á netinu
þannig að tengingar og samstarf þeirra á milli verði virkara og baráttan því öflugri. Allar
upplýsingar frá þessum aðilum mun verða hægt að finna út frá einum stað og
tilvísunarkerfi internetsins nýtt til hins ýtrasta. Allar upplýsingar sem berast um
fíkniefnavandann verður þannig safnað saman á einn stað.
Einnig er fyrirhugað að koma af stað virkri umræðu á netinu innan fyrirhugaðra alþjóðasamtaka um það hvernig megi vinna bug á fíkniefnavandanum. Magnús Egilsson, framkvæmdastjóri Ægis, segir að ekki hafi áður verið ráðist út í að skipuleggja baráttu á heimsvísu gegn fíkniefnum á netinu áður
- í mesta lagi hafi verið mynduð lausleg tengsl á milli nokkurra aðila.
Sigrún Ólafsdóttir er vefstjóri hjá Ægis og hún segir viðbrögðin vera góð við undirbúningi stofnunnar alþjóðasamtaka á internetinu sem eiga að berjast gegn fíkniefnum. Söfnun til handa
aðilum sem berjast gegn fíkniefnum mun fara af stað á internetinu innan skamms. Hún
verður þannig skipulögð að fyrirtæki verða fengin til að styrkja baráttuna með því að
greiða vissa upphæð fyrir hvern tölvupóst sem kemur inn vegna söfnunarinnar. Við
segjum nánar frá þessari söfnun þegar hún fer formlega af stað. Rætt var við Sigrúnu
Ólafsdóttur í fréttatímanum.
Allur réttur áskilinn, © FM 95.7.
|